广州与米芝莲

时间：2017-05-10 16:00 来源：www.yidiandian-tea.com 作者：1点点奶茶

国际著名美食指南，《米芝莲红色宝典》2015年版公布，香港餐厅占据64间。贵为美食之都嘅广州，虽然都有米芝莲大厨坐阵，但上榜餐厅就一间都冇。呢件事，应该点睇呢？

其实，自从米芝莲开始瞄准中国，我就惗：可能好长一段时间，广州优秀餐厅都同米芝莲无缘了。

一来，大家饮食理念唔同。洋人觉得好味，中国人未必受落。呢一点，港澳地区就好明显了。当年，第一批上榜餐厅几乎全部做西餐，而且大部分系米芝莲嘅家乡菜：法国菜。后来，陆续增加粤菜馆，但又引发争议，有啲本地美食家话唔正宗—呢啲未“东西方口味唔同”咯！

二来，大家对于环境要求唔同。米芝莲对环境要求好高。我去过澳门法国菜餐厅“天巢”，佢嘅前身Robuchon a Galera好早就获得米芝莲三星。碟，要几千蚊一个；叉，要上千银；装修处处精致，环境奢华高贵。相比之下，广州人相当实际，向来唔中意“食装修”，所以著名食肆装修典雅，服务亲切，但唔会豪到吓死人。

因此，法国原生嘅米芝莲，同广州原生嘅食肆，注定天然有距离。不过，喺处处强调国际化嘅今日，广州美食需要米芝莲拓展，而米芝莲又点会离得开广州？所以，呢个餐饮名榜嘅到来，无疑会令广州餐饮业更加丰富，市民就更有口福啦。